Առաջին անգամ բռնելով մեքենայի ղեկը՝ շատերին կարող է տիրել տագնապի ու վախի զգացումը։ Մեքենա վարելը գայթակղիչ է, սակայն ավելացնում է պատասխանատվության և զգոնության զգացումը։ Մենք հաճախ սովորում ենք մեքենա վարելու կանոնները՝ մոռանալով ամենակարևորի՝ վախերի հաղթահարման կամ գոնե դրանց կառավարման մասին։
Իսկ ինչպե՞ս կառավարել թվացյալ անկառավարելին կամ ձերբազատվել նրանից, ինչն ապրում է մեր մեջ որպես ինքնության մի մասնիկ։
Մեքենա վարելու վախից ազատվելու առաջնային և ամենակարևոր պայմանը ավտովարման մասնագիտացված դպրոցներում սովորելն է։ Գիտելիքն ավելացնում է մարդու ինքագնահատականն ու ինքնավստահությունը, սրանք էլ իրենց հերթին նվազեցնում են վախի զգացումը։
Եթե ունեք ավտովարման բավարար գիտելիք, սակայն վախի զգացումը Ձեզ չի լքում, ուրեմն պետք է դրանցից ձերբազատվել այլ տարբերակներով։
Մեքենա վարելու սկզբնական շրջանում մեքենայում մենակ գտնվելը վախի հիմնական պատճառներից է։ Ուստի կարևոր է՝ նախնական փուլում կազմաակերպել կարճաժամկետ ավտովարումներ առավել ծանոթ վայրերում՝ մտերիմ անձի հետ։ Ընդ որում՝ կարևոր չէ, որ այդ անձն ինքը վարորդ լինի։ Կարևորն այն հոգեբանական հանգիստ միջավայրն է, որը ստեղծվում է նրա ներկայությամբ։
Աստիճանաբար անհրաժեշտ է դուրս գալ հարամարավետության գոտուց և երթևեկել ոչ միայն ծանոթ ու առավել հանգիստ փողոցներով, այլ նաև քաղաքային մեծ փողոցներով և մայրուղիներով, երբեմն՝ առանց որևէ մեկի ուղեկցության։
Առանձնացրեք ճանապարհային երթևեկության ընթացքում ձեզ անհանգստացնող կամ առավել բարդ թվացող վարորդական բոլոր գործողությունները և աստիճանաբար՝ հեշտից բարդ հաջորդականությամբ, կատարեք դրանք։ Օրինակ, եթե երթևեկության ընթացքում դժվարանում եք փոխել գիծը, խուճապի մեջ եք ընկնում ծանրաբեռնված փողոցով երթևեկելիս կամ բեռնատար մեքենայից վազանց կատարելիս, ապա փորձեք նախ առավել հանգիստ փողոցներում սովորել փոխել երթևեկության գիծը, հետո՝ կատարել վազանց, ապա աստիճանաբար և պարբերաբար դուրս գալ ծանրաբեռնված փողոցներ։
Շատերը գտնում են, որ ճանապարհին երաժշտություն լսելը շեղում է, բայց կա նաև հակառակ կարծիքը. այն հանում է ավելորդ լարվածությունը և բարձրացնում ինքնավստահությունը։ Ավտովարման ընթացքում երաժշտությունը խանգարող, թե օգնող գործոն է՝ որոշում եք ինքներդ, սակայն կարևոր է ի նկատի ունենալ, որ բարձր երաժշտությունը ազդում է մեր գիտակցության վրա և «ստիպում» բարձրացնել նաև ավտոմեքենայի արագությունը։
Մեքենա վարել նշանակում է լինել զգոն և զինված լինել գիտելիքով, իսկ վախերը․․․ դրանք անցողիկ են։
