Շատերը գուցե կհիշեն՝ ինչպես էին նորաթուխ վարորդները տարիներ առաջ սովորում մեքենա վարել և ովքեր էին վարորդ – հրահանգիչների դերում։ Այո՛, հայրը, քեռին, հորեղբայրը կամ ավտոմեքենա  ունեցող ընտանիքի մտերիմ ընկերը ստանձնում էր վարորդական դասեր տալու իրավունքը և գործնական դասերին զուգահեռ, երբեմն, պատմում երթևեկության կանոնների մասին։ Եվ սա այն դեպքում, երբ մեր «վարորդ-հրահանգիչն» ինքը շատ հաճախ չէր տիրապետում այդ կանոններին, իսկ իրական երթևեկության մեջ խախտումներն իրենից անպակաս էին։

Հիմա իրականությունն այլ է։ Ավտոմեքենա վարել սովորեցնելն այլևս հարազատ-բարեկամի պարտականությունը չէ, իսկ մարդիկ սկսել են ավելի լուրջ մոտենալ վարորդի մասնագիտությանը և հասկանալ՝ երթևեկության կանոններին թերի տիրապետող վարորդը փորձանք է մյուս վարորդների և հետիոտների համար։

Սովորելով մեկ անգամ ավտոդպրոցում՝ վարորդը կարող է վստահ լինել, որ իր ձեռք բերած գիտելիքներն իրեն հուսախաբ չեն անի, քանզի ավտոդպրոցն ապահովում է․

1․ Կանոնակարգված դասեր

Ավտոդպրոցում տեսական և գործնական դասերը հստակ տարանջատված են և հաջորդում են միմյանց։ Միայն ճանապարհային երթևեկության կանոնների վերաբերյալ ամբողջական գիտելիքներ ձեռքբերելուց հետո, ուսանողն սկսում է իր գործնական վարման դասերը։ Ստացվում է՝ ղեկին նստում է արդեն իսկ տեսական մասով գիտակ վարորդ, ում մնում է միայն հասկանալ մեքենայի կառուցվածքը և սովորել վարել իրական երթևեկության մեջ։

2․ Մասնագիտական մոտեցում

Ավտոդպրոցներում դասավանդում են պրոֆեսիոնալ մասնագետներ, ովքեր տիրապետում են ճանապարհային երթևեկության կանոններին և մեքենավարման նրբություններին, ինչպես նաև՝ պարբերաբար հետևում են ոլորտային օրենսդրական փոփոխություններին։

3․ Կահավորված մեքենաներ

Գործնական դասերն իրականացվում են կահավորված մեքենաներով, ինչը նվազեցնում է, նույնիսկ վերացնում է, սխալվելու դեպքում վնասելու կամ  վնասվելու հավանականությունը։

4․ Ինքնավստահություն

Երթևեկության մեջ վարորդը կարող է հայտնվել ցանկացած իրավիճակում՝ ընդհուպ վթարային, իսկ ավտոդպրոցի դասընթացներն օգնում են խուճապի չմատնվել, պահպանել հանգստություն,  արագ կողմնորոշվել և դուրս գալ այդ իրավիճակից նվազագույն վնասներով։

Թվում է՝ ավտոմեքենա վարելն այնքան էլ բարդ գործ չէ և կարելի է ընդամենը մեկ-երկու ամսում դառնալ վարորդ։ Սակայն, նստելով ղեկին, շատ հաճախ մոռանում ենք պատասխանատվության այն մեծ զգացման մասին, որն ունենք մեր մեքենայում գտնվող ուղևորների, մյուս վարորդների, հետիոտների և, իհարկե, ինքներս մեր նկատմամբ։ Հարկավոր է լուրջ մոտեցում ցուցաբերել վարորդի մասնագիտությանը և արժանի լինել վարորդական իրավունք ստանալու պատվին։ Իսկ այս մասնագիտության մեջ կայացման ճանապարհին խիստ կարևոր է ավտոդպրոցի դերը, ուստի առկա ավտոդպրոցների շարքից ընտրություն կայացնելիս՝ վստահ եղեք, որ Ձեր նախընտրած ավտոդպրոցը կապահովի վերը նշված 4 կետերը։