Վարորդական իրավունք ստանալը շատերի համար կարևոր իրադարձություն է։ Դա նման է ավարտական քննություններին, երբ պետք է ի ցույց դնես ողջ գիտելիքներդ ու հուսախաբ չանես նրանց, ովքեր ևս անհամբեր սպասում են արդյունքներին։
Հայաստանում վարորդական իրավունք ստանալու ընթացակարգերը շատ պարզ են․ նախ հարկավոր է ձեռք բերել տեսական և գործնական հմտություններ, ապա հանձնել քննություն համապատասխան մարմնում։ Ոչ մի արտասովոր բան, թերևս մեզ համար։ Սակայն արի ու տես, որ աշխարհի տարբեր երկրներում վարորդական իրավունքի վկայական ստանալու ընթացակարգն աչքի է ընկնում մի շարք պարտադրանքներով։ Մեզ համար դրանք գուցե արտասովոր ու անհասկանլի են, սակայն շատ տրամաբանված ու տեղին են այլ երկրներում։ Օրինակ՝ Էկվադորում վարորդական իրավունք ստանալու համար հարկավոր է ներկայացնել արյան կարգի, իսկ Գվատեմալայում՝ պենիցիլինից ալերգիայի բացակայության մասին տեղեկանք։ Բութանի իշխանությունները ՎԻ վկայականի համար պահանջում են լուսանկար ազգային տարազով։
Վարորդական իրավունքի համար տրվող ամենաբարդ քննությունը Չինաստանում է։ Տեսական քննության հարցաշարը բաղկացած է 1400 հարցից՝ յուրաքանչյուր տոմսում՝ 100 հարց։ Քննությանը դրական արդյունք ապահովելու համար հարակավոր է 45 րոպեում ճիշտ պատասխանել հարցերի առնվազն 90%-ին։
Իսկ ամենապարզ ՎԻ ձեռքբերման ընթացակարգը գործում է Մեքսիկայում։ Այստեղ վարորդական իրավունք ստանալու համար հարկավոր է վճարել մոտավորապես 28 Եվրո և վերջ։
Քիչ չեն նաև աշխարհի տարբեր կետերում ընդունված ճանապարհատրանսպորտային երթևեկության այն կանոնները, որոնք թերևս մեզ՝ հայաստանցիներիս համար անսովոր են, գուցե նույնիս անտրամաբանված։ Այսպեսով՝ Մակեդոնիայում արգելվում է ոգելից խմիչքի ազդեցությամբ նստել վարորդի կողքին՝ վերջինիս սխալ ուղղություն ցույց տալուց խուսափելու համար։
Ալաբամայում արգելված է մեքենան վարել փակ աչքերով։) հետաքրքիր է՝ ո՞ւմ մտքով է նման բան անցել։
Իսկ Մասաչուսետս նահանգում արգելված է գորիլային տեղափոխել մեքենայի հետևի նստարանին դրած։
Իսպանիայում տեսողական խնդիրներ ունեցող վարորդները պարտավոր են մեքենայում ունենալ լրացուցիչ օպտիկական ակնոց, հակառակ դեպքում վարորդը կտուգանվի։
ՃՏՊ-ների մեծ թվով պայմանավորված՝ Կիպրոսի կառավարությունը պարտադրել է բնակիչներին վարելու ընթացքում երկու ձեռքը չկտրել ղեկից։ Վարորդը կարող է մեծ տուգանքի ենթարկվել, եթե նույնիսկ մի պահ ձեռքը հեռացրել է ղեկից՝ ջուր խմելու նպատակով։
Ահա այսպիսի տարօրինակ քննական և երթևեկության կանոններ։ Եվ, հավատացե՛ք, սա դեռ ամենը չէ․․․
